بربّي خلّيوها "يا توانسة يا أحرار يا راقين" ما تردّوهاش "يا توانسة يا جواعة يا انتهازيّين"... وتفكّرو: راهي ثورة كرامــــــــة par infosplus.org

هاذا أوّل مقال بش نكتبو بالدّارجة باش نتأكّد اللّي النّـــاس لكلّ تفهمني بدون استثناء.و لهاذا ماذابيّا كان تنشروه قدّ ما يمكن.ـ

كلامي موجّه للنّاس اللّي ها الأيامات خرجت تتطالب بمطالب اجتماعيّة و نقابيّة كيما : الزّيادة في الشّهاري...و التّرسيم... وغيرو مالمطالب المشروعة و الغير مشروعة.

نحبّ نقوللهم: يا ولادي يهديكم و يصلح رايكم راهو مــــــــــــــــــاهــــــــوش وقتـــــــــــــــــــــو! ! ! ! ... ماهوش وقتو بالكلّ.

أوّلا البلاد مزّالت خايظة و كيما نقولوا بلوغتنا: على كفّ عفريت! معتاها توّا الزّلقة بفلقة. و كان ما نحلّوش عينينا و نركّزوا كلّ دقيقة على الذّيوبة اللّي تنهش في لحمنا و لحم لبلاد ... رانا بش نقوموا نلقاو الواد هزّنا للهاوية. موش توّا نقولوا العام صابة! مزااااااال الطّريق في أوّلو! ـ

ثانيا راهي الحكومة الموجودة توّا حكومة مــــــؤقّـــــتة! معناها ما عندها حتّى شرعيّة تسمحلها باش تمسّ الزّيادات و الشّهاري و غيرو! مهمّتها الوحيدة : تصليح الدّستور و قانون الأحزاب و الجمعيّت و التّحضير للانتخابات! يعني مهمّتها ارساء الدّيمقراطيّة و ركائز المجتمع المدني.

ونحبّكم تفهمو حاجة : راهو الضّمان الوحيد اللّي عندكم على المستقبل هو مجال الدّيمقراطيّة و الحلرّيّات اللّي باش ناخذوهم توّا.

الزّيادة اللّي طامع فيها من عند الحكومة هاذي، غدوة من غير دستور و من غير ديمقراطيّة و من غير أحزاب و جمعيّات و من غير مجتمع مدني رااااااهي ما تقعـــــدش و بش يصير ما أدهى و أمرّ مالشّهريّة الضّعيفة و الخدمة الصّعيبة.

ليوم البلاد حاشتها بيكم في ظهرها! باش تحميو الثّورة و مكتسباتها و بش تظمنو الّي غدوة خير مليوم و من لبارح! يزّينا مالهمّ و الغمّ و النّاس اللّي تحلم بالخارج و اللّي تحرق في فريجيدار. نحبّو بلاد نكبّرو فيها أولادنا مطمانين.

و هذا ما يصير كان بالصّبر و طول النّفسّ و كان ما نتعلّمو نرتّبو الأولويّات و نخمّو كجزء من كلّ! مصلحة لبلاد قبلنا لكلّ .

نعرف اللّي فمّا باااااااااارشة مظطهدين و مظلومين و عرقهم متّاكل .

و نعرف اللّي أغلب المطالب مشروعة و ظروريّة.

و نعرف اللّي ما يحسّ الجمرة كان اللّي يعفس عليها! ! ! و

صدّقوني أنا أوّل من ياقف في صفّكم و يدافع عليكم! أما موش توّا! بعد الانتخابات أطلبوا و الشّعب الكلّ وراكم يسخّنلكم كتافكم و يحميكم و ياقف معاكم! أما موش توّا يا توانسة يا أحرار! فيقو راهو الماء يجري تحت ساقيكم.

و ما تخافوش! ما تقولوش كان تريض لومور تو ما يتصلّحلنا شيء! راهو ماهوش صحيح بالعكس. كي ليوم تتلهاو بالرّسمي و الصّحيح و اللّي بيه الفايدة كيما خدمة الحكومة الجديدة و الاحزاب و تاقفو يدّ في اليدّ بالمرصاد لكلّ التّجاوزاة و ما تخلّيو حتّ كلب حاشاكم يفكّلكم ثورتكم و لّا يركبلكم عليها, وقتها تضمنو مصالحكم الحقيقيّة! خاتر اللّي يفهم يعرف اللّي مصلحتكم من مصلحة لبلاد! و ما يقعد في الواد كان حجرو!

اسألو رواحكم زعمة علاش التّلافز التّونسيّة سلّمت في الملمّة و اللّي فمّة و ما تعدّي كان في اللّي يشكي و اللّي عندو مطالب نقابيّة و اجتماعيّة؟ على خاطر فمّا أطراف تعرف حقّ المعرفة الخطر متاع الشّي هاذا في وقت كيما هذا و ماذابيها كان كلّ تونسي يتلها بمشاكلو الشّخصيّة و ينسى البلاد. و لهذا فيقوا.!

و ما تنســـــــــــــــاوش: البـــــــوعزيــــــــزي (اللّه يرحمو و ينعّمو) ما حرقش روحو كي جاع! كي جاع قصد ربّي و مشا يخدم! البوعزيزي حرق روحوا كي تهان و كلا كفّ و كرامتو تمسّت!

تفكّروا الأشراف المناضلين اللّي اعتصموا في القصبة و حتّى كي حبّو يرشيوهم و يشريو كرامتهم بالفلوس رفضو! و قالو ما جيناش عالفلوس

تفكّروا علاش ماتو الشّهداء يا توانسة يا أحرار

و احشمو من دموع المّيمة اللّي دفنت ولدها في سبيل الكرامة و الحريّة.

احشمو من دمّ الشّهيد اللّي مزال ما شاحش.

و انت يا اللّي تقرا في ها الكلام: هزّ راسك و أغزر مالشّبّاك. ريت أكل الأفق؟ هذاكا وراه بحرّ, و ورا لبحر بلاد بعييييييدة فيها دار عايش فيها فلان في عمرك ما يتكلّمش لوغتك و دينو موش دينك... أما يحكي عليك! يحكي على بلاد ميساحتها ثلث مساحة التّكساس... غيّرت وجه التّاريخ و حرّكت قلوب العالم من خايف و من حاير و من متشجّع و من فخور و من غاير! اي نعم! انت يا تونسي يا حرّ! علم بلادك تهزّ في ألبانيا و في ايطاليا و في مصر... ضدّ الطغيان و القهر ! و ناس عمرها ما راتك تصيح : حتّى أنا كيف التّونسي نحبّ الحريّة و نحبّ الكرامة!

ثورتنا كانت درس في المسالمة و العزّة و الرّقيّ! ما تبلبزوهاش بالتّسرّع خلّيو كلّ حاجة في وقتها.

نشالّه تكونو فهمتو كلامي و ما تغشّشتوش منّي. و كلّ بنادم يغلط. أما المفيد يلقف روحو قبل ما يفوت الفوت.تحيا ثورتنا المباركة و يحيا شعب تونس العزيز (بكلّ ما في العزّ من معنى.) .ـ

par Nina InWonderland

Posted in: